“Haar Oë “

Haar Oë Vertel ‘n Verhaal

Deur Anita Senekal

Sy is anders. Nie net ‘n gewone mens nie, maar iemand wat diep voel en sonder grense liefhet. Sy het ‘n hart vol onvoorwaardelike liefde – ‘n liefde wat nie vrae vra of vereistes stel nie. Sy gee haar hele wese vir ander sonder om iets terug te verwag. Dis wie sy is, anders as die res.

Wanneer die wêreld sou lag, huil sy oor die kleinste dinge – die dinge wat ander nie eens raaksien nie. En wanneer die wêreld huil, vind sy ‘n manier om te lag. Sy sien humor in die donkerste oomblikke, want sy verstaan dat daar altyd lig is, al is dit net ‘n sprankie. Sy is anders, want sy sien skoonheid in gebrokenheid. Die wêreld is vol mense wat gebroke is, maar sy sien die skoonheid wat hulle self nie meer kan raaksien nie. Sy glo aan hoop waar daar skynbaar geen hoop meer is nie. Selfs in die diepste wanhoop klou sy vas aan die idee dat daar nog ‘n kans is – vir genesing, vir verandering, vir lig.

Dis wie sy is. Sy is die een wat anders loop, anders dink, en anders voel. Die eensame meisie. Soos ‘n boek wat jare lank in die hoek van ‘n winkel lê, vergete en vol stof, wag sy vir iemand wat haar sal raaksien. Baie loop verby, min gee haar aandag. Maar dié wat die moed het om die stof af te vee, vind ‘n titel wat hulle nie verwag het nie: “Haar oë.”

Haar oë vertel ‘n storie van liefde, verlies, hoop en genesing. Dit is ‘n storie wat net die dapperes sal lees, en net diegene wat bereid is om werklik te verstaan, sal waardeer. Want sy is anders. Sy is uniek. En haar verhaal, haar liefde, haar hoop – dis ‘n storie wat ‘n verskil maak.

Sy is anders, en juis daarom is sy die moeite werd.